واش غادي تبقى ساكنة العالم القروي بإقليم الحاجب كاتلقى مشكل ديال رخص البناء وربط الكهرباء .. وماذا عن البرنامج الوزاري والمخطط السامي؟!
واش غادي تبقى ساكنة العالم القروي بإقليم الحاجب كاتلقى مشكل ديال رخص البناء ؟
فواحد الوقت اللي كتعاني فيه ساكنة العالم القروي من مشاكل عدة، خصوصا فيما يخص رخص البناء فالأراضي الفلاحية اللي مساحتها أقل من هكتار، خرجات دورية وزارية مشتركة كتشجع على إحداث اللجنة الإقليمية المشتركة باش تسهل المساطر وتبسط الإجراءات على المواطنين وهادشي بناءا على برن، لكن المفاجأة اللي خلّات بزاف ديال الناس يتحيروا، هي أن إقليم الحاجب باقي ما فعلش هاد اللجنة، رغم أن جل أقاليم المملكة سابْقاه فهاد الموضوع، اللي كيصدم كثر، هو أن حسب مصادر مطلعة، كاين أزيد من 40 طلب للرخص فهاد الصيغة، وجميعها ترفضات من طرف قسم التعمير بعمالة إقليم الحاجب، بمبرر أن السيد العامل السابق ما عطاش الأوامر باش تتشكل هاد اللجنة، وكأن المصلحة العامة رهينة تعليمات سابقة وشنو المصير ديالها مستقبلا، مع العلم أن الدورية الوزارية عندها طابع ملزم وماشي اختياري، زيد على ان الدستور المغربي، فالفصل 31، كيأكد على حق المواطنين في السكن اللائق، وكيشجع على العدالة المجالية ورفع الحيف على المناطق القروية، وهادشي كيوازيه كذلك القانون 12.90 المتعلق بالتعمير، والقانون 25.90 المتعلق بالتجزئات العقارية، اللي فتحو المجال لإحداث لجان خاصة تسوي وضعيات السكن القروي، بدون تعقيدات مفرطة.
لكن واش معقول أن الجماعات بحال آيت حرز الله وآيت بورزوين ،ايت نعمان وجماعات اخرى بإقليم تعاني من نفس الوضعية، تبقى معطلة فقط حيت مازال ما تفعلاتش لجنة؟ واش غادي نبقاو نحكمو على الناس بالبناء العشوائي أو العيش فبيوت بدون ترخيص وكيفاش غادي يربطو خط الكهرباء الا ماتعطاتش لليهوم الرخص ، فقط لأن الإدارة السابقة ما بغاتش تواكب المستجدات القانونية وشنو غادي دير الادارة الحديثة مستقبلا بخصوص هاد الاشكال؟
الغريب فالأمر أن هادشي للي واقع، ولا فرصة ذهبية لبعض السماسرة اللي كيدخلو كوسطاء، ويستغلو الحالة الاجتماعية الضعيفة للساكنة حسب بعض المصادر، وكيبدأو يبيعو الوهم ويوعدو الناس بتسويات مقابل عمولات، وهادشي كيضرب فـ مبدأ الشفافية والنزاهة اللي كيتكلم عليه الميثاق الوطني للاتمركز الإداري.
المطلوب اليوم، هو أن السيد العامل الحالي لإقليم الحاجب السيد عمر المريني ان يتفاعل بسرعة مع هاد الملف، ويفعل اللجنة المشتركة للبث فطلبات البناء فالمجال القروي، ويوقف نزيف السمسرة، ويرد الاعتبار للقانون والمؤسسات. لأن احترام الدورية الوزارية راه ماشي اجتهاد شخصي بل واجب قانوني وهادشي لعبر عليه فمجموعة ديال المناسبات وزيارات للي دار كاتلمح لعهد الاصلاح ..لعهد جديد.
واش غادي تبقى ساكنة القرى فالحاجب خارج حسابات التعمير؟ ولا غادي تكون رؤيا ومعالجة مستقبلا من طرف عمالة اقليم الحاجب؟
----------بقلم اسامة القادري ✌🏼👑🇲🇦
#اقليم_الحاجب : #جماعة_ايت_حرزالله #جماعة_ايت_بورزوين #جماعة_ايت_نعمان #جماعة_اقدار #جماعة_ايت_بوبيدمان #جماعة_تمشاشاط #جماعة_لقصير #جماعة_سبع_عيون #جماعة_سبت_جحجوح #جماعة_اكوراي #جماعة_الحاجب #جماعة_بني_مطير #جماعة_عين_معروف ...الخ
-------- #اقــلــــيــــم_الـــحـــــاجـــــب----------
